قصيده الشاعر المرحوم ( جلوي مطر التبيناوي الشمري )

مش القلم واحذر يطول امتداده ..........
وصوغ الحروف بلطف نقش يحليه
واكتب امني ما قال فكري وراده ..........
فتحت صندوق بالاسرار مخفيه
ابيات شعر تاق قلبي عداده ..........
بصندوق قلبي بين الاضلاع حاويه
جوهر وريحه عنبر مع زباده ..........
ولولو ومرجان مساطير صافيه
الله يهدي من يشاء من عباده ..........
من هاويه كفر والالحاد مغويه
والناس كل له طريق اعتياده ..........
وكل هوى فكر دليله يكديه
ولا تغالط الغالي يحدك عناده ..........
يرث صدى بالقلب والا انت تطنيه
واحفظ بسرك خل عندك جلاده ..........
ولو هو صديق اغلا صديق مصافيه
لابد من الايام يجن اصداده ..........
ويبيح سرا بالصداقه اتناجيه
والمال لو ينمى سريع نفاذه ..........
اما ارتحل والا عميله مخليه
ما فك من عله جضيع الوساده ..........
والمال ما نجى عن الموت راعيه
الطيب ذخر للفتى هو سناده ..........
يبذر به الحسنى على اللي يلفيه
طيبه مضاعف في ليالي حصاده ..........
يفوق ما عد وخسر به يغطيه
والمرجله لو هي تجي بالهياده ..........
كل يرحب به تراحيب غاليه
دونه وعور وكود عزم وراده ..........
والطيب عسر صعب ملس مراكيه
لا خير من يفتخر بماضي اجداده ..........
وهو عاجز عن ربع الاول يسويه
النار له ورثه رماد سماده ..........
قفو على جمر تراكب ويطفيه
ولا حد خذا حق لحق زياده ..........
الناس كل دون حقه وعانيه
ودنياك ما كل لحق به مراده ..........
كم واحد قفى ولانا طاريه
وهذي لها سنه طبيعه وعاده ..........
تقدير رب خالق الكون محصيه