ليه ديننا ضعيف في كل ديره؟!!!

ياالله يااللي مالتجينا لغيره = يارازق المخلوق ياخير وهاب
مزيّن سمانا بالنجوم المنيره = تفكنا من كيد تخطيط الأحزاب
بالعيد شاهدنا ( دجاج الحظيره ) = يعدم ( أسد ) .. والليث ثابت ولاهاب
شفنا الصدر والمالكي مع وزيره = تستروا .. وعن الأسد لبسوا حجاب
ماقربوا له لين لاقى مصيره = عجزوا ينوشون الأسد سيد الغاب
هم شرذمة وشلة عصابة حقيره = شيعه .. وتبقى للكفر حلف وأذناب
يابوش لاتفرح حبالك قصيره = لاتخدعك ( نشوة نصر حرب الأعصاب )
ياليت من حطك بغرفه صغيره = وأدخل عليك صدام ثم قفل الباب
والله دماغك بس يسمع صفيره = وتصبح تهاتي ، ومن الذعر صرت مرتاب
السيف أغمد ياعرب في جفيره = من يوم صدام البطل راح بغياب
شنوا علينا مخططات(ن) كثيره = يوم ألصقوا بإسلامنا وصف الإرهاب
يخسون والإسلام ربي نصيره = يعز دينه بقدرته رب الأرباب
ياالله ياللي عالم(ن) بالسريره = تفتح لنصرة دينك أبواب وأبواب
وتعيد أمجاد الخيول المغيره = وخالد وحمزه وعامر(ن) وابن خطاب
وتداوي جروح(ن) بالضماير مريره = مايداويه علم(ن) ولا طب الأعشاب
ضعيف هالإسلام في كل ديره = المشتكى لله ... وإليه متاب
الدين هان .. وصار بحالة خطيره = وحنا نتفاخر ( بالمناصب والألقاب )
هذاك شيخ القوم وهذا أميره = وذاك الرئيس وذاك من يقطع أرقاب
ليه ديننا ضعيف في كل ديره ؟!! = المشتكى لله ... وإليه مئاب