المسعد اللي مانقل هم دنياه

بديت باللي يجلي الهم ذكراه = القاضي القاضي على كل هاجوس
سبحانه اللي بأمره الكون سواه = سبحانه اللي هازم الصرب والروس
الشافي اللي صبّر ايوب واشفاه = القادر اللي بأمره ايغيّر انفوس
من عقب ذكر الله يالقرم والله = بعض الحكي كنه مثل حدة الموس
ولاّ مثل سهمٍ خذا القلب مرماه = راميه ذاك اللي تقل فمه القوس
شخصن على ماقيل سودن نواياه = تقدر تقول انه على اللسب مهووس
ياصاحبي ماهمني قول شرواه = لنّه دشر قلبه من الغل متروس
طنشت انا شرواه يوم انه ادواه = طنش ترا التطنيش بيغيّض انجوس
ياصاحبي لا لا تغشك سواياه = روس الحيايا ماتجي غير بالدوس
هذي قصيده وافهم اليوم معناه = مضمونها من امر واقع وملموس
من صاحبن ينصحك من حر ماجاه = ماخذ من الدنيا تعاليم ودروس
المسعد اللي مانقل هم دنياه = مادوّر الشهره ولا دوّر فلوس
دنياك هذي ماعرفنا خفاياه = كم شمخّت روسن وكم طمنّت روس
ياصاحبي هالناس به ناس واشباه = فيهم وليده وفيهم انسان ملحوس
وصلاة ربي عد حرفٍ كتبناه = على شفيع الناس في لحظة الهوس