قصيدة الشاعر / منصور بن سعدي بن رجاء الرمالي على الشاعر / هايف بن نعيم المطيري

على الويلان ساعدنا الطنايا = ردينا لعظمتهم يقينا
وبن رشيد أخذنا جواده = وخذت في ملك فنتان سنتينا

حربنا كلكم عشر القبايل = وعبرنا نجد منكم مانثينا
وكلنا روس عباس الظفيري=وياما روس من مثله كلينا

بديت في ذكرمن فيه أستعينا =اله الكون في ذكره بدينا
عظيم الشان رب الخلق الأحد=تعالى الله خير الخالقينا
اله حرم الظلم وتوعد =توعد بالعذاب الظالمينا
ومن بعد ذكره بدينا بالمثايل =تركت النقص واخترت الحسينا
وأرد الرد لابن نعيم هايف =وأحذر من يذم الغافلينا
أحذر مثل هايف كل هافي =يتجنب لأ بشره يبتلينا
يتجنب كان هو يبغى حياته =وياويله كان هو طاح بيدينا
يعيف الاوله هي والتوالي =ويعرف أفعالنا ليا من بلينا
ويعرف ان الفعول فعول شمر=وشمر بالفعول المثبتينا
انا ماذم حمران النواظر =ولانا من يسب الغافلينا
أخاف الله انا وأدراء عذابه=وعسى ربي من الظلم يحمينا
ولكن بلاني هايف اللي =ذكر لي غلبنا غلبُ علينا
بدى في ذمنا والبادي أظلم =فتل حبله وبالنقض أبتدينا
تمادى بالغرور وبالمذمه=ظلم نفسه وجعل حظه دفينا
غزانا الهيس بلسانه وأخذنا =وذبحنا بالكلام ولادرينا
ردي النفس مادرى ويش أصابه =ولاأدري وشبلا الخايب علينا
ولأدري وين ربعه عن كلامه=علامه مالقاله ناصحينا
قليل العرف مثل الورع ينصح=ولكن مانصحوه العارفينا
ولا أدري وشبلا الجاهل تجاهل=فعايل من لهم فعل يقينا
جهل فعل القبايل غير شمر=ويقول ان مطير نجم معتلينا
ولكن ماحد حسب حسابه=ولا لحساب من مثله خذينا
احده وان بناء بيتٍ نهده=واذا عاند على خشمه وطينا
أهينه لين ينسى بأمس وينه=ولا يعرف اليسار من اليمينا
وينسى كيف ينضمن القوافي=ويتبدل زجره الماضي ونينا
ألا يالذيخ وشخلاك تكذب =وتحط نفسك بمقام الكاذبينا
تقول بكير ذبحت الطنايا =متى ذا صار يأبليس اللعينا
على كيفك تذبحنا بزيفك =بزيف وكذب وأوهام تغزينا
ترى في كير ماذبحت شمر=خذيتوا مثل ماحنا خذينا
ولكن أذكرك بأم الجماجم =بها زدنا عليكم وأعتلينا
هزمناكم بها أكبر هزيمه =وترى ماسلمو إلا الهاربينا
بها صلنا وجلنا لين نلنا =ورجعتو خاسرين ونادمينا
تندمتو على حرب الطنايا =ورجعنا للغنايم كاسبينا
طنايا نروي الظامي من الدم =على راس المعادي له حنينا
وإذا يالهيس تجهل فعل شمر =سل التاريخ يعطيك اليقينا
واذا انك ناسي له ماتذكر =ترى التاريخ يذكر مانسينا
وسل الأجواد عن تاريخ شمر =كبار السن والي فاهمينا
يعدون الصحيح ويقنعونك =واللي يخفاك منها لك يبينا
هل الذمه هم التاريخ سلهم=ولو هم من عربك ألاقربينا
تركد وأنشد العقيل عنا =قبل تنظم وبالقيل تهجينا
تقول مطير صاروا عون شمر=على الويلان معنا قايمينا
متى شمر طلبوا العون منكم =كذبت ولالكم فضلُ علينا
ولكن قل مع ابن سعوود قمتوا =ومع مبارك وقفتوا وإلتقينا
وعليكم بالصريف الرعب خيم =ورجعتوا مع مبارك خاسرينا
أعنتوهم علينا وأنهزمتو =عوينُ خيب ظن المستعينا
فلا نلتو مديح ولا سلمتو =مثل من عايد يم القريتينا
وتقول الضيغمي شلتو جواده =وخذت في ملك فتنان سنتينا
أقول انت تهبا كاذب وكاذب =فلا شالوا عموم مطير شينا
كذوب وبالخطاء عمدُ تعمد =لعنك الله لعنه كل حينا
تقول أنه قليل اللي غلبكم =وتقول بكل وقعه فايزينا
ونسيت الغزوه اللي قد غزاها =حدا اللي بالحجاز مسيطرينا
أبن عون الشريف أسمه محمد =غزاكم وين فعلك مايبينا
ذكركم عن ملاقاه أنتحيتوا =ولا تخفى عليك ولا علينا
وشواهدها قصيده من غزاكم =ونفس النص موجود لدينا
وغزانا والتقينا به بموقق =وحنا اللي ثبتنا مانتحينا
تقابلنا وصار الصبح ظلما =يشيب من الفزع راس الجنينا
صمدوا فرساننا تسعين لليله =سناعيسً لضده ماتلينا
وجت زوبع وطير العز غنا =أناشيد النصر للصامدينا
بذاك اليوم سمينا الطنايا=طنايا مانهاب ليا طنينا
طنايا مارضينا بالمهونه =ولا نرضاء المهونه ماحيينا
طنايا الذل ماننزل جواره =وعلى أنفسنا المذله مارضينا
طنايا وإن نطحنا كل غازي =يرتعد خوف من يقبل علينا
طنايا من حربنا له ظربنا =نصب الويل فوق اللي يجينا
طنايا نارد حياض المنايا =أسودً بالحروب مجربينا
طنايا عندنا تحل القضايا=حرارً بالعلالي معتلينا
طنايا نكرم العاني ونعطي =وعطاينا الجلايل ليا عطينا
طنايا وان نصانا كل ضايم=يشوف العز من ساعة يجينا
فكم من واحد ضاق وزبنا =زبنا مستظيم وله حمينا
حمينا من لجا يطلب حمانا=ودحرنا كل غدار ونحينا
طنايا يوم رماح القوم تخطي =تصيب رماحنا من به رمينا
طنايا فعلنا فعل يترخ =ويبقى ماعلى البيداء بقينا
تدارسه الاجيال غير حنا =عظيم لو جحده الجاحدينا
طنايا هم سلاطين الجزيره=وهم الحكام في ماضي السنينا
طنايا من الزمن قرن حكموها =اضف عشرين معهن حاكمينا
تسيدنا وسدنا بالقبايل=قبايل نجد كله له ودينا
وتسلطنا بحد السيف الابتر =ازحنا من تولاه وولينا
وليناه وحكمناها بقوه =ماهي هدو اخذناه ليدينا
على يدنا هدمنا حكم دوله =وعلى يدينا لدولتنا بنينا
كتبنا اسم الطنايا فوق عرشه =واسم من كان يحكمها محينا
وفتحنا في سجل الحكم صفحه =وصفحة من حكم فيها طوينا
حكموا فيها الرشيد ابطال شمر =نعم هم من حكم حكماً مكينا
ترى شمر فعايلهم تعجز =وتراهم بالفعول المقدمينا
تلقبنا بغلبا ماانغلبنا=لكثرة غلبنا العايل علينا
طنايا على الاضداد قاسين وصيارم =يلينن الجبال ولانلينا
طنايا وان نخانا كل مبلي =توشحنا الهنادي ونتخينا
ونخينا كل مقدام مجرب =وجمعنا الجمع وبالجمع التقينا
وخذنا بثار من صوت لشمر =بدل هذلول شيخين رمينا
مشى هايس لهم لعيون هيفا =تنخوى وانتخى ذرب اليمينا
وفعل فعل رفع روس الطنايا=وعلى فعله خصومه شاهدينا
ونوانا الشيخ بن هندي بحايل =وحنا من نوانا له نوينا
تحركنا ونزلنا له بعروى=قصرنا عنوة الشيخ وعنينا
وتقابلنا الضحى والشمس حيه =خسر فيها وحنا الرابحينا
ورجعنا للجبل معنا الغنايم =عوايدنا ليا منا غزينا
وفعلنا المعجزه في كون بقعاء=وذبحنا كل طاغي ماطغينا
ثلاثة الاف من مات وتصوب =نهار ِفيه شاب المرضعينا
نهار ٍ فيه سوينا الهوايل =على أغلب جمعهم حنا قضينا
صفاء بقعاء عليه الدمع غطى=وكم من راس شيخٍ له وطينا
شريدتهم حلف واقسم وطلق =فلا يغزي مدى عمره يمينا
وحاصرنا الكويت شهور اربع =وثلاث قلاع بالجهراء بنينا
ولاذو في حمى الانجليز عنا =وفعلنا المعجزات ولا انثنينا
ونخانا الشيخ بن ثاني واجبنا =كما العاده ليا انتخينا مشينا
امرنا الضيغمي نمشي وسرنا =لبني ياس وهل البحرين جينا
وصلنا لدار بن ثاني واغرنا =على جمع الغزات الطامعينا
وهزمنا جمعهم والكل يشهد =وشواهد ماذكرت القلعتينا
الى يومك باسم برزان تعرف =دلايل فعلنا لو ماحكينا
يكونن الفعول بفعل فاعل =وحنا للصعاب الفاعلينا
وغزينا الجوف يوم رويل زادو =وهدمنا دونها الحصن الحصينا
وذبحنا بالهنادي كل خير =بقطع الراس للغادر جزينا
حصدناهم وابدناهم اباده =هزمناهم واخذنا البيرقينا
علينا يبتغون الزود لكن =تطيح الروس ماتعلى علينا
وغزينا المنتفق بااطراف دجله =هزمنا جمع خزعل وارتكينا
هزمنا اللي مع مبارك يحامي =وعن الفزعات ياماله نهينا
لكنه تمادى في غروره =تناسى فعلنا مادري نسينا
ودفع قيمة غروره نصف جيشه =جزا للكبر واستهزيه فينا
يقود جموعنا شبل مجرب =شجاع لايذل ولايلينا
شجاع كل اهل نجد تهابه =ويهابونه هل البصره وسينا
له الشيخان يهدون الهدايا =وله الفرسان هيبه خاضعينا
سلاطين الدول تاخذ حسابه =ولااحد فيه يقدر يستهينا
وجميع ال الرشيد ابطال شمر=لهم فعل وتاريخ مبينا
جمعو بين الاماره والشجاعه =ومابين اللين والعزم المكينا
ولو نجد حموها واحتموها =اسود الغاب حامين العرينا
اسود مايهابون المعادي =اسود يقهرون المعتدينا
اسود اسياد سادو بالجزيره =اسود عيال اسود محنكينا
اسود اسياد سادو كل سيد =وهم الاسياد رغم المنكرينا
وترى شمر تميزهم ثلاثه =بها عن غيرنا متميزينا
صخانا الحاتمي من دور حاتم =اضف معه الشجاعه ثم دينا
ورثنا الجود من ابو الجود حاتم =بنا الامثال تضرب كل حينا
وسكنا بالجبل قبل النبوه =ومابعد النبوه له حمينا
ونحينا عن جبلنا كل طامع =بحد السيف قطاع الوتينا
وباراضي نجد قد رفرف علمنا =ومن البحر لحد الرافدينا
تحت راياتنا تمشي قبايل =ومن يعصي على داره مشينا
وحنا هل المروه والاخوه =واذا ضاقت على المبلي يجينا
وكنا اهل المروه والسياده =لنا تخضع رقاب العالمينا
طنايا للمعالي فوق نرقا =سنام المرجله فوقه رقينا
طنايا لقولنا تشهد فعايل =هل الفعل الاكيد موكدينا
لنا التاريخ يشهد بالحقايق =مع اهل العرف فيها شاهدينا