الديوان المقروء للشاعر مشفي الجرواني

قال الذي نـط الطويلـة وواقـه=حزة غروب الشمس تالي شفقها
يرقابه اللي جاير الوقت ساقـه=ياصار روحه عابثن به زهقهـا
طويلهٍ مرقـاب رأسـه شفاقـه=غبر السنين مهدماتـن شنقهـا
نزل به اللي هز ربعـي فراقـه=روحه خذاه الخالق اللي خلقهـا
هذا نضد بيتـه ومرتـع نياقـه=وصلفيحتن مشب ناره حرقهـا
مرحوم ياللي سكره الموت ذاقه=جاه العميل ورغبتـه مالحقهـا
(ابو شخير) لم شمـل الرفاقـه=صار السبب لضعوفٍ الله رزقها
له شوفهٍ مـداه واسـع نطاقـه=ولـه كلمـهٍ يتمهـا يانطقـهـا
لكل الرفاقه في حجاجـه طلاقـه=مانحاز مع ناسٍ ونـاسٍ فهقهـا
ياما دمح زلـة خطـاة العلاقـه=لجل السفينة ينقذه من غرقهـا
اضفى على بيت المعزة رواقـه=وحفظ لنا دم الوجيـه وعرقهـا
عاف الطمان ومرقب العز شاقه=شيخٍ رفيعات المعالـي عشقهـا
عسـاه للجنـة ولـذة مـذاقـه=في جاه مولج صبحها مع غسقها
هذا و(ابو سفـاح )كلـه لباقـه=حياضه بوجه الظامية مادفقهـا
ماسبب القـالات بيـن الرفاقـه=نزيه عن كبر النفوس وجوقهـا
من شجرةٍ خيره وفيـرٍ رقاقـه=ماكونت شـوكٍ يغطـي ورقهـا

قال الذي يسكت ويخفـي ظروفـه=مبطي يابو ثامر غثاء الوقت ناشه
قلبي معزب والطـواري ضيوفـه=متعب ومن جور الدهر به لياشـه
حوادث الدنيـا عظـل فيلسوفـه=على بساط البحث يتعـب نقاشـه
مهما تزخرف ماعليهـا حسوفـه=والله ماتسـوى جنـاح الفراشـه
مافيه حي ٍ سالماً مـن صدوفـه=صعلوك والاّ من هل الجاه باشـه
ترميه في قبـرٍ توحـش كهوفـه=لو كان بالدنيـا حريـراً فراشـه
بصدور خلق الله مضارب سيوفـه=محد ٍ يقاوم سطوته يا ستهاشـه
هذا ونفسـي يامفضـي عيوفـه=تشوم عن عظـمٍ قليـلٍ عراشـه
قلبي يحب البر لـو بـه كلوفـه=شمت هواء الغربي تزيد انتعاشـه
من فوق جيـبٍ صافيـات بلوفـه=قشيط هملـولٍ لصوتـه حشاشـه
ياصرت خامس لاربعه ومحفوفـه=الكل منهم هبـت الريـح حاشـه
بالمزح نجحف والرجال معروفـه=مايزعـل الا واحـدٍ بـه دحاشـه
في خايعٍ ماناش عشبـه حفوفـه=متلاحماً نبت الوعر مـع دشاشـه
قفراً جنابه يطرب القلـب شوفـه=لايابعد شوفـة مسلسـل قماشـه
بس الحباري فيـه برقـاً دفوفـه=تطير شوف العين ماهي بشاشـه
ومعنا ربيـبٍ عايـزاتٍ وصوفـه=عدل المناكب منطحه بـه رباشـه
وبالوصف وان قفا تعارض كتوفه=بيضٍ سراويلـه بكفـه حراشـه
ياشالوا البرقـع وحقـق بشوفـه=وتل السبوق وظم غيظه بجاشـه
شافه تجضع خارمـه ومخطوفـه=بين الرجاء والياس زاد اندهاشـه
وتكبرت من زود رعبـه وخوفـه=وحول عليها مثل لمحـة فلاشـه
وجيناه يمزر من معاليـق جوفـه=دمه على صدر النداوي طشاشـه
يبادل على منتق نحرهـا كفوفـه=متخالطٍ فيـه الزعـل والبشاشـه
هذا هوى قلـبٍ همومـه تلوفـه=وعلى الولي رزق النفوس ومعاشه

يالله ياقاسم علـى النـاس مـدّك = أنت الذي تقسم معوشـة عبـادك
تمدنا مـن بـاب رزقـك ونـدّك = عن الحرص والنار نطلب برادك
يالعبد لاتبدي على النـاس سـدّك = بعض العرب وده يجـود قيـادك
يمثّل بوجهك دور شخص ٍ يـودّك =وبحكي القفا يسعى لصالح لهـادك
حربه خفي ودايم الـدّوم ضـدّك = واليا حصل له فرصة ٍ فيك صادك
على الكلام الشين غصب ٍ يحدّك = يبحث خفاك بشرهتـه وانتقـادك
ولاتفتخر بأفعال عمّـك وجـدّك = وأنت الذي ماعاد يقـدح زنـادك
ياصار يقصر عن مردّه مـردّك = ماينفعك تنفيـخ طافـي رمـادك
تفخـر بفعـل ٍ ماتحقـق بيـدّك =تركب على كور ٍ وتترك شـدادك
ترى المراجل وقفتك عنـد حـدّك = وبذل الجهود لعصبتك واجتهـادك
وترى الكبر بأثناء مسيرك يلـدّك = وتبلغ على ضو التواضع مـرادك
واللي بداء بالصد بـاده بصـدّك =وعلى رفيع الشأن خل اعتمـادك
اعنز على اللي ياطلبتـه يمـدّك = هوالـذي يكفـل شرابـك وزادك
وعليك باللـي يانخيتـه يسـدّك =اللي بحـزات اللـوازم سنـادك
لو كـان مابـده قريـب ٍ لبـدّك =يسوى القريب اللي يسره عنـادك
ومجالس ٍ على النميمـه تحـدّك = أخير منهـا عزلتـك وانفـرادك
وبعض المواقف للكتابـة تشـدّك = تبحث خفي اللـي يكنـه فـؤادك

يالله لا تيبس من الخوف ريقي=في موقعٍ موحش وشعثٍ طروشه
قبر المقصر وسعه لا يضيقي=يا فقت أنا من ظمته عقب دوشه
في محكمة عدل حسابه دقيقي=ياقتص للجلحا وتحشر وحوشه
ينصب عل متن جهنم طريقي=يصيبني من زود رعبه رعوشه
يسمع لها من زود غيضه شهيقي=من رعبها صم القلوب مخروشه
يأرب عضني عن صديده رحيقي=في جنتن للمتقين معروشه
يالمصطفى لو حبنا لك حقيقي=ما فضوا الخاتم بليره وبوشه
الشرق الأوسط ولعوبه حريقي=وحنا نتبجح والقلوب مغشوشة
يوم السلف حبوك حبن وثيقي=من خوفهم كسرى تراجف عروشه
ربعي وقف يشدا مهابة طويقي=قدم كلب الفرس واربك جيوشه
في غيرهم مدح البشر ما يليقي=هم طلقة البندق وحنا قفوشه
ويوم الخلف حبوا نجوم ألفريقي=وحبوا مسلسل طاش وغوار طوشه
صرنا حثا لن ما نفك الو سيقي=مثل الكباش اللي تنادر بحوشه
يبحث خفا العاقل خطات الدفيقي=قليل ميز ومطغياته قروشه
بمضمار ميدان المعاصي سبيقي=ناسن من النعمه تطاحس كروشه
روس الحصن يادخلت بالعليقي=يصبح صهيله للنقذ والمعوشه
بحر الفتن هايج وموجه غريقي=يبكي بها العاقل ويضحك دحوشه
أمة محمد ما بقي له صديقي=مبطي زعالا والخشوم مخموشه
فوقه غراب البين ينعق نعيقي=ما غير هيكل والعظام معروشه
الأمة اللي كان مجده عريقي=كرامته عقب الشموخ مخدوشه
اقرب مثل غزو العراق الشقيقي=غزو احتلال وردة الفعل هوشه
واقرب مثل جرح الجريحة عميقي=تبكي صلاح الدين يكحل رموشه
واقرب مثل بجوار بيتن ٍ عتيقي=تجثم على سطوح المنازل دشوشه
وأقرب مثل فساقنا له نهيقي=بـستار أكاديمي تناهق جحوشه
يابوش لو طال الظلام السحيقي=سهم الرمية كل مجرم يطوشه
عملاقنا نايم وقرب يفيقي=شمس الضحى تفضح مطامن خفوشه
اخسو خسيتو سبكم ما يليقي=بافضل نبي ٍ يالكلاب الهروشه
بابي وامي يالحجاج الطيلقي=يامدرسة نور الوجيه البشوشه
عفوك شمل سادات قوم ورقيقي=وترحم فروخ الراجنة في عشوشه
سامحت من حط القذر بالطريقي=يوم اليهودي خير عفوك يحوشي
وصلوا على اللي بالفقارا رفيقي=بالرفق وصى كل نفس هشوشه
كيزان حوضه ساطعن له بريقي=يطفي ظما كبدن لحقها عطوشه

أقفى الشباب وعنفوانـه وطيشـه=والشيب يامفضي لحانـا ربشهـا
مادامت الدنيـا لصفـوة قريشـه=عنها رحل واستدنته فـي نعشهـا
وافنت حكم كسرى وقيصر وجيشه=وعدل النجاشي في رعية حبشهـا
لا كشـرت بانيابهـا مستهيـشـه=تدمـي قلـوب الغافليـن بنمشهـا
مايغوي العاقـل رغيـده وعيشـه=يزهد به العاقـل وتغـوي دبشهـا
تلهث ورى الدنيا نفوس ٍ عطيشه=لا خير بالجيفة ومن هو عرشهـا
إلا السجود بنفس عبـد ٍ هشيشـه=مع دمعتن من خشية الله محشهـا
يا نام ثلث الليـل خطـو الوليشـه=سجادته فـي طاعـة الله فرشهـا
وناجى الكريم اللي بخيره معيشـه=يخشع ليا مـن المقصّـر رقشهـا
وحنا غزينـا بالفيـون وحشيشـه=بارض ٍ بها الطاهر سجد وافترشها
نخوض حرب ٍ مايتشافى خريشـه=حرب ٍ مصاويبه تنتـف شوشهـا
دسايس ٍ عذراء اجهزت مستبيشه=كيف الكرامة يالنشامـى تخدشهـا
اهل التجـارة بالرسيفـر وفيشـه=قامـت تشيّـد للرذيلـة ورشهـا
الغرب رب العلمنة فـي عريشـه=أم ٍ تغـذّي مـن لبنهـا جحشهـا
حتى العقيـدة خططـوا لتهميشـه=ناب الغدر ياحفـاد خالـد نهشهـا
قلت آه من واقع زمـان ٍ نعيشـه=وقت ٍ جمع ريّ الكبود وعطشهـا
من الترف وضغوط ضنك المعيشه=نفوس خلـق الله كثيـر ٍ طفشهـا
وناس ٍ على ناس ٍ قلوبه غشيشـه=وعند اتفه الأسباب تارم خششهـا
كم واحد لو نتّـف العـوز ريشـه=تثمر مطاريش السعد يـا طرشهـا
ياهاب ميـدان الأصايـل كديشـه=يطمح لمرقـاب السنـود وليشهـا
وصلوا على المبعوث صفوة قريشه=شفيعنا بـري الكبـود وعطشهـا

يا قلب يا قلب الشقا ويش مغضـبك = من جور وقتك صايرٍ بك حمـاقه
ما أخذت عِبرة من نتايج تجاربك=عكست مفهوم العداوة صـداقه
يا ما غلطت وغلطتي من سبايـبك=تدخل مجالٍ وأنت خارج نطـاقه
ماني على شيءٍ مضالك معاتـبك=لازم نصحح نقطة الإنطـلاقه
يا صار غلطات الخلايق تجنـبك=لا تنفعل .. ما دام مالك عـلاقه
ترى الرفاقه باللوازم جنايـبك=عزي لمن يحتاج .. ماله رفـاقه
يا صرت بحماهم ترى خاب طالبك=خصمك ذليل وصار حقّه شفـاقه
لو رخّصوا بالسوق غالي جـلايـبك=البيت ما يذري بليّا رواقه
ولا كل بيتٍ يا تذرّيت يحجـبك=بصلف الهبوب اللي سريع إصطفـاقه
بعض البيوت عن الهبايب ذرا شبك=ما ينقعد باللي هتيتٍ شقاقه
وعن العلوم العوج نزّه شواربك=لا خير في هرج على غير فـاقه
وترى جليس السوء للسوء يصحـبك=لا تنخدع باللي علومه رقـاقه
وترى الكِبر بين الخلايق يخـرّبك=تصير من بين المخاليق عـاقه
لو أنت تدّي بالمواجيب واجـبك=طابع غرورك زاد عقلك مصـاقه
وعليك باللي يا نصيته يوجّـبك=لذروة سنام المجد زاد اشتياقه
عادة رفيع الساس ياقف بجانبك=وألاّ الرّدي وقت اللوازم عـلاقه
ترى الرّدي لو هو من اقرب قرايـبك=اكبر غنيمه يا حصل لك فـراقه
يا أقفيت بصدور المجالس يعذربك=ويا أقبلت رحّب باحترام ولبـاقه
وليا ضهدك الوقت زوّد مصايبك=قام يتعلّم باليتيم الحـلاقه
نوبٍ قريبٍ لك ونوبٍ محاربك=مثل الشري مذكور مرٍّ مـذاقه

المشكله ماهو خبر موت صدام =بالمشنقـه ولا توفـى طبيعـي
رجلٍ تشهد عند تنفيذ الاعـدام =وافضى لربٍ باب عفوه وسيعي
المشكله تشويه مفهوم الاسـلام= بيدين علماني وملحد وشيعـي

يالله تجعـل لـي مـع النـاس ودي =لاتجعلن منبـوذ بيـن الاصاحيـب
ارحـم عيـونٍ يـم عفـوك تلـدي= تشدق لواسع رحمتك عقب تثريـب
ان ماشملتني رحمتك خـاب سـدي= ماعاد لي بحبال عفـوك مقاضيـب
انت الرجاء ياشـوه الـدود خـدي= وجاله على الجسم الممـدد جناديـب
ورحلت عن ربعـي وحيـي وبـدي =في مظلـمٍ مابيـن لـج الضنابيـب
يابـو فـرج يجـدر بنـا نستعـدي =للغايب اللي غيبتـه غيبـة الذيـب
دنياك ماتسـوى الزعـل والتحـدي= وانت الـذي عايشتهـا بالتجاريـب
رجـل فهيـم ولا عليكـم تـعـدي =مثلك يعرف المخطيـه والمواجيـب
لو كان بعض الناس عنـا يصـدي =ياجـب علينـا نبادلـه بالتراحيـب
ونسلّم على الزعلان لـو مايـردي= من شان نسلم من غضب عالم الغيب
يابـو فـرج مـال الرعيـه مقـدي =والضيف مايشكر صنيـع المعازيـب
بحر الفتـن مابيـن جـزرٍ ومـدي =نعيش عصـر العولمـه والاكاذيـب
وجميـع دربٍ للتهـالـك يــودي =الا الطريق اللي نزيهٍ عـن العيـب
وحـبٍ ماهـو لله يقفـاه صــدي =اكذب من الصبغه على صادق الشيب
وتم الجواب وسامحن فـي مـردي= كانه حصل تقصير ياكاسب الطيـب
وعلى اللذي مـن سنتـه نستمـدي= صليت واثني لآشرف الخلق ترحيب

شفي عشر خلفات وعشراً معاشير =مع وايتٍ يقطع نفود البيــــــــــّـــــــــد
مثل البرد بالوصف وضحٍ مغاتيـر =معهن بكارٍ ماتلاهن قعيــــــــــّـــــــــد
وبالذكر اقزر باقي العمر تقزيـــر =لعل قلبي عن همومه يهيــــــــــّـــــــــد
محدٍ مقيم ومن ورانا مشاويـــــــر = مامن مزاهب والمسافه بعيـــــّـــــــــــد
دنياك هاذي بين يسر ومعاسيـــــر =هي ماتبيد وللخلايق تبيـــــــــــــّـــــــد
في ساحته تصارع الشر والخيـــر =زهد به اللي للمخاليق سيــــــــــّــــــــد
اقفة على قائد جموع وطوابيــــــر =اللي به ابدع بالقصايد فهيـــــــــّــــــــد
عقب الترف والعز شاف المحاقير = ضرغام دجلة بالكلبشات قيــــــــّـــــــد
للمشنقة قادو ذبيح الخنازيــــــــــر =عليه بوش بعيد الاضحى يعيـــــــــــــد
مات الزعيم الشهم موت المشاهير = رباط جاشه وقت الاعدام جيــــــــّـــــد
وحنا نتباها لاعبين وجماهيـــــــر = في فوزنا نسعد سعادة سعيـــــــــــّــــــد
ناسٍ تدمر نعمة العقل تدميــــــــر = دايم على درب التهالك تسيــــــــّــــــــد
نتابع نشاط البورصة والهواميـــر =لاكل الربا وامعاملاته انـــيـــــــــــّـــــد
ولاعم سمحين الوجيه المسافيــــر =اللي لبنيان الفضيلة تشيّـــــــــــــــــــــد
ولاينتصر جيشٍ تقوده مزاميـــــر =يرقص طرب على قصيــــدة عنيـّــــد
ياصار ماتسمع تشهد وتكبيــــــــر = نصبــح غثا سيــلٍ ضربله نفيـــــــّـــــد
والرابح اللي للهدف واصل السير = بسنـة نبيه و الكتاب متــقيــــــــــــّــــــد
ادلي بدلوي مع هل الشعر بالبيـر =ولاقول انا القاضي ولابو زويــــــّـــــد
وصلّو على اللي بيّن الشر والخير =اشرف شريف للمخاليق سيــــــــــّـــــد

بسم الإلـه المعتلي الواحد الرب الغفور=رب الملاء جزل العطاء محيي النفوس الزايله
أعوذ به وألوذ به من كل شيطان وشرور=وستغفره وسترحمه وسأله من فضايله
وسأله حسن الخاتمه والستر في يوم النشور=في موقف من يفشله ماتنستر فشايله
وبدى بموضوع الشعر والشعر عنوان الشعور=وكلِ شعوره ياشعر يظهر خفا الي شايله
وأنا دفعني للمثل رجل الوفاء الشهم الغيور=حتى بصوغه للشعر عنده طموح هايله
مهو من اللي سخره لجل المسبه والفجور=وليا تتبعت الحقايق نادرٍ صمـايله
يعجبني اليانطق يدخل على القلب السرور=اما عبر والا عظه والا النصيحه قايله
مثل ابوعارف بالشعر يلعب على كل البحور=مشفي اليامنه قصد جواهر مثايله
له مفرداتٍ بالحكم ومعالجة بعض الامور=ويسعى لجمع التفرقه والطيب من خصايله
في مجلسه تلقى المهلي والمهيل والبخور=وتلقى به كرام السبال الي تجيب الطايله
سماح الوجيه الغانمين اللي لهم كلمة وشور=وراع النقيلي مايرّوج بينهم نقايله
اخوان دين بهالزمان اللي كثر فيه الفتور=وقلت به حميا الرجال معدلين المايله
يامشفي انا بأسألك وبي منك راي وشور=وبي منك وجهة نظر وابي منك دلايله
اشوف لي وقتن وظنه من علامات الدبور=الله يجنبنا المصايب نوخت رحايله
فيه الحسد فيه الفسق فيه التبرج والسفور=قل الحيا وقل التقا وكثر به رذايله
استرجلت بعض النسا واستأنثت بعض الذكور=انتكست الفطره بهم واستخلفو بدايله
وشفت البدو اهل الغنم قامت تنافس بالقصور=والدش ببيوت الشعر يجلب لهم رزايله
تحول الباطل عدل وصبح كلام الحق زور=وصارت به سلوم العرب مثل سراب القايله
بهذا الزمن ماتنفرق برق الحباري والصقور=تخالطت في بيئةٍ ماتنعرف فصايله
ماظنتي هالدور جا مثله على مر العصور=والله اعلم وش بقا هي تنئمن حبايله
ولك التحيه يابوعارف والسماح من القصور=وصلو على اللي كمّل الله بالحسن شمايله

بسم الاله المعتلي للمذنب التايب غفور=يغفر ذنوب اللي يتوب من الدروب المايله
يالله تحمينا من اسباب التكاسل والفتور=نعوذ بك ياربنا من مغريات الزايله
يارب ثبتنا بتثبيتك على جسر العبور=عن زلتن داخل لضا ياولعة شعايله
بك نلتجي وانت الرجا يابعثرت تلك القبور=وقمنا من الاجداث مثل النبت بارض سايله
يوم التغابن والحشر يوم التنادي والنشور=من فوقنا مقدار الميل تدنو شمس القايله
يوم السما والارض بامر الواحد الخالق تمور=كالعهن تصبح مشمرخات الجبال الطايله
يختل وضع الكون يامن سجرة كل البحور=وتناثرت كل الكواكب والمواقف هايله
احدن خذا وقرا بشماله صفحة الويل وثبور=واحدن خذا وقت التطاير في يمينه فايله
في موقفن مافيه حبن للتسلط والظهور=تذهل به المرضع جنين راضعٍ مشايله
واهلا هلا يامرحبا ياشاعرن كله شعور=في منتها الابداع صاغ من الشعر جزايله
يابومهند يعجبن رجلن على الشده صبور=يوم ان غيره مايشيل الحمل حمله شايله
رجلن يحب الخير متواضع وللنعمه شكور=مايرتجي ياكود منهو مايخيّب سايله
سمحن جنابه واقعي الا على دينه غيور=دايم على درب السلف متولجن رحايله
طهّر لسانه ماقذف من رابطو على الثغور=قليل هرج لياهرج هرجتن معه دلايله
الله يجنبنا المصايب والكوارث والشرور=ويفكنا من شر من ينصبلنا حبايله
اهل الكباير والمعاصي والتمادي والفجور=بثوا سموما قاتله متعددتن وسايله
وكثر التساحن والتباغض من علامات الدبور=بالمجتمع متفشين من بين حتى العايله
وصلو على من جعلت الارض الزكيه له طهور=ليارحل وهموم الامه رمز الامه شايله